លោកនាយករដ្ឋមន្ត្រី ហ៊ុន សែន បញ្ជាក់ជាថ្មីថា សាលក្រមតុលាការកាត់ទោសលោក សម រង្ស៊ី ប្រធានគណបក្សសង្គ្រោះជាតិ មិនមែនជារឿងនយោបាយ ហើយលោក សម រង្ស៊ី ត្រូវតែជាប់ពន្ធនាគារ។ ការអះអាងរបស់លោក ហ៊ុន សែន ធ្វើឡើងនៅពេលដែលលោក សម រង្ស៊ី កំពុងមានវត្តមាននៅប្រទេសសិង្ហបុរី ចូលរួមកិច្ចប្រជុំក្រុមប្រឹក្សាអ្នកសេរីនិយម និងអ្នកប្រជាធិបតេយ្យអាស៊ាន។ លោក សម រង្ស៊ី នៅតែបញ្ជាក់ថា សាលក្រមតុលាការទីក្រុងភ្នំពេញ ជាលេសនយោបាយរារាំងលោកមិនឲ្យចូលរួមការបោះឆ្នោត។
សេចក្ដីថ្លែងការណ៍លោក សម រង្ស៊ី ផ្សាយកាលពីថ្ងៃអង្គារ ទី៥ ខែមីនា ដែលមានចំណងជើងថា “គ្មាននរណាជឿរដ្ឋាភិបាលលោក ហ៊ុន សែន” អះអាងថា រដ្ឋាភិបាលនៃប្រទេសជាសមាជិកអាស៊ាន បានទះកំផ្លៀងរដ្ឋាភិបាលលោក ហ៊ុន សែន ដោយសារប្រទេសទាំងនោះមិនបានឃាត់ខ្លួនលោកនៅពេលលោកមានវត្តមានក្នុងប្រទេសទាំងនោះ។
លោក សម រង្ស៊ី បន្តថា ក្នុងរយៈពេលប៉ុន្មានឆ្នាំចុងក្រោយនេះ លោកមានវត្តមាននៅប្រទេសមួយចំនួន ដូចជា ថៃ ភូមា ឬ មីយ៉ាន់ម៉ា សិង្ហបុរី ហ្វីលីពីន និងម៉ាឡេស៊ី ប៉ុន្តែសមត្ថកិច្ចនៃប្រទេសទាំងនោះមិនបានឃាត់ខ្លួនលោកឡើយ។ លោកបន្តថា សមត្ថកិច្ចនៃរដ្ឋាភិបាលទាំងនោះមិនបានចាប់អារម្មណ៍នឹងសាលក្រមតុលាការក្រុងភ្នំពេញឡើយ។ ប្រទេសទាំងនោះយល់ថា គណបក្សប្រជាជនកម្ពុជា កំពុងព្រួយបារម្ភពីវត្តមានលោកនៅកម្ពុជា ដើម្បីចូលរួមការបោះឆ្នោតខែកក្កដា ឆ្នាំ២០១៣ ខាងមុខ។
លោក សម រង្ស៊ី ត្រូវបានតុលាការកម្ពុជា កាត់ទោសឲ្យជាប់ពន្ធនាគាររយៈពេល ១២ឆ្នាំ ពីបទដកតម្រុយបង្គោលព្រំដែន និងបរិហារកេរ្តិ៍។
អ្នកនាំពាក្យក្រសួងមហាផ្ទៃ លោកឧត្ដមសេនីយ៍ ខៀវ សុភ័គ កាលពីថ្ងៃអង្គារ ទី៥ មីនា មានប្រសាសន៍ថា រដ្ឋាភិបាលមិនបានស្នើសុំឲ្យរដ្ឋាភិបាលដទៃទៀតឃាត់ខ្លួនលោក សម រង្ស៊ី ឡើយ ដោយសារតែលោក សម រង្ស៊ី មានសញ្ជាតិបារាំង៖ «តុលាការកម្ពុជា លោកកាត់ទោសឯកឧត្តម្ភ សម រង្ស៊ី ជាជនជាតិខ្មែរទេ។ ដីកាតុលាការកម្ពុជា នៅតែមានជាធរមាន នៅពេលលោក សម រង្ស៊ី ជាន់ទឹកដីខ្មែរ»។
ការលើកឡើងរបស់លោក ខៀវ សុភ័គ នៅពេលនេះ ផ្ទុយទៅនឹងការអះអាងរបស់លោកពីពេលកន្លងមកថា រដ្ឋាភិបាលមានគម្រោងស្នើរដ្ឋាភិបាលបារាំង ចាប់ខ្លួនលោក សម រង្ស៊ី បញ្ជូនមកកម្ពុជា។
គេហទំព័ររបស់ប៉ូលិសអន្តរជាតិ (Interpol) មិនមានព័ត៌មានស្វែងរកចាប់ខ្លួន លោក សម រង្ស៊ី នោះទេ។
លោក ហ៊ុន សែន កាលពីថ្ងៃអង្គារ បញ្ជាក់ថា ការកាត់ទោសលោក សម រង្ស៊ី មិនមែនជារឿងនយោបាយឡើយ។ លោកបន្តថា លោក សម រង្ស៊ី ត្រូវតែជាប់ពន្ធនាគារ៖ «ទៅដកបង្គោលតម្រុយព្រំដែនទើបជាប់គុក ហើយគេថា បង្គោលនោះថ្លៃប៉ុន្មាន? វាអត់ថ្លៃទេបង្គោល តែវាថ្លៃលើផ្លូវច្បាប់ វាត្រូវតែចូលគុក»។
វិទ្យុអាស៊ីសេរី មិនអាចទាក់ទងលោក សម រង្ស៊ី បានទេ នៅថ្ងៃពុធ ទី៦ មីនា។ លោក សម រង្ស៊ី ធ្លាប់សំដែងក្ដីសង្ឃឹមថា លោកអាចចូលរួមការបោះឆ្នោតនៅខែកក្កដា បាន ដោយសារតែសំពាធសហគមន៍អន្តរជាតិ៕ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.