ដោយ ទេព សុរ៉ាវី
2013-02-04
ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រ និងសម្ដេចព្រះមហាក្សត្រី ព្រះវររាជមាតាជាតិខ្មែរ បានថ្វាយព្រះភ្លើងផ្ទាល់ព្រះហស្តដល់ព្រះបរមសព ព្រះបរមរតនកោដ្ឋ កាលពីវេលាម៉ោង ៦ និង ៣០នាទីយប់ ថ្ងៃទី៤ ខែកុម្ភៈ។
មាននាម៉ឺនសព្វមុខមន្ត្រី យោធា ស៊ីវិល មន្ត្រីរាជធានី-ខេត្ត រួមទាំងឥស្សរៈបរទេសជាន់ខ្ពស់ជាច្រើនរូប បានចូលថ្វាយបង្គំព្រះបរមសពជាគ្រាចុងក្រោយ មុនពិធីថ្វាយព្រះភ្លើង។ ប្រជាពលរដ្ឋរាប់សែននាក់ ក្នុងទឹកមុខក្រៀមក្រោះ ខ្លះយំសោកសង្រេងស្ដាយស្រណោះព្រះបរមសព មិនត្រូវបានអនុញ្ញាតឲ្យចូលក្រាបបង្គំលាព្រះបរមរតនកោដ្ឋជាលើក ចុងក្រោយ ក្នុងពិធីថ្វាយព្រះភ្លើងនៅពេលយប់នោះទេ។
ពិធីថ្វាយព្រះភ្លើងព្រះបរមសព ព្រះបរមរតនកោដ្ឋ បានប្រព្រឹត្តទៅដោយអមនឹងការថ្វាយស័ង្ខរបស់ក្រុមបារគូ ការបាញ់កាំភ្លើងធំ ១០១ណាត់ ភ្លេងពិណពាទ្យ ភ្លេងក្លងឆ្នៈ ក្រុមភ្លេងត្រែទ័ព និងកងកិត្តិយសនៃកងយោធាទាំងអស់ ថ្វាយប្រគំកំដរព្រមៗគ្នាកាលពីវេលាម៉ោង ៦ និង ៣០នាទីយប់ ថ្ងៃទី៤ ខែកុម្ភៈ។
មុននឹងថ្វាយព្រះភ្លើងដល់ព្រះបរមរតនកោដ្ឋ ក្រុមបារគូនៃព្រះបរមរាជវាំងមួយក្រុម បានធ្វើពិធីដង្ហែព្រះភ្លើងចេញពីព្រះបរមរាជវាំង ដើម្បីទៅរក្សាទុកនៅព្រះបរមបញ្ចា តាំងពីម៉ោង ១១ និង ៣០នាទី ថ្ងៃត្រង់ សម្រាប់ថ្វាយក្នុងពិធីបូជាព្រះបរមរតនកោដ្ឋ។
ព្រះភ្លើងសម្រាប់ថ្វាយព្រះបរមសព ត្រូវបានក្រុមបារគូត្រៀមទុកតាំងពីសប្ដាហ៍មុន ដែលបានធ្វើពិធីសុំព្រះភ្លើងពីព្រះសូរ្យសែង ឬកម្តៅព្រះអាទិត្យ។ ក្នុងពិធីសុំព្រះភ្លើង ក្រុមបារគូបានដាក់កំណាត់ខ្លឹមចន្ទន៍ក្រស្នាតូចៗជាឈើក្រអូបនៅពី ក្រោមកែវពង្រីក រហូតទាល់តែកម្ទេចឈើនោះឆេះចេញជាអណ្ដាតភ្លើង ទើបក្រុមបារគូយកទៀនទៅអុជចម្លងយកភ្លើងនោះទៅរក្សាទុកសម្រាប់ ថ្វាយព្រះភ្លើងព្រះបរមសព។ ពិធីសុំព្រះសូរ្យសែងនេះ គេឃើញមានតាំងពិធីថ្វាយព្រះភ្លើងហ្លួងសោយរាជ្យពីជំនាន់មុនៗ។
នៅពេលយប់ ក្នុងពិធីថ្វាយព្រះភ្លើងព្រះបរមរតនកោដ្ឋ ជាវេនចូលក្រាបថ្វាយបង្គំលាចុងក្រោយរបស់នាម៉ឺនសព្វមុខមន្ត្រី យោធា ស៊ីវិល មន្ត្រីរាជធានី-ខេត្ត ព្រះរាជវង្សានុវង្ស រួមទាំងឥស្សរៈបរទេសជាន់ខ្ពស់។ រីឯប្រជាពលរដ្ឋសាមញ្ញដែលត្រូវអនុញ្ញាតឲ្យចូលថ្វាយបង្គំព្រះបរមសព រយៈពេល ៣ថ្ងៃជាប់ៗគ្នានោះ ត្រូវបានហាមឃាត់ចំថ្ងៃបុណ្យថ្វាយព្រះភ្លើងតែម្តង ដោយសមត្ថកិច្ចបានដាក់បារ៉ាស់ជាច្រើនថ្នាក់ រារាំងរលកមហាជនមិនឲ្យសម្រុកចូលក្នុងបរិវេណព្រះបរមមេរុនោះទេ ដោយសម្អាងថា ដើម្បីរក្សាសណ្ដាប់ធ្នាប់ និងសន្តិសុខដល់ថ្នាក់ដឹកនាំជាន់ខ្ពស់ និងអ្នកមុខអ្នកការជាច្រើនរយនាក់ ដែលបានចូលរួមក្នុងពិធី។
តែទោះជាយ៉ាងណា ខាងគណៈកម្មាធិការជាតិរៀបចំព្រះរាជពិធីបុណ្យព្រះបរមសព ក៏បានអនុញ្ញាតឲ្យប្រជាពលរដ្ឋចូលគោរពព្រះបរមរតនកោដ្ឋ នៅពេលព្រឹកពីម៉ោង ៧ ដល់ម៉ោង ៩។ ការចូលថ្វាយបង្គំប្រញាប់ឲ្យទាន់វេលាបិទសម្រាប់ត្រៀមកន្លែងក្នុង ពិធីពេលយប់នោះ ប្រជាពលរដ្ឋរាប់សែននាក់ដែលប្រជ្រៀតគ្នាយ៉ាងណែនតាន់តាប់តាំងពី ព្រហាម មិនបានក្រាបថ្វាយបង្គំព្រះបរមសពឲ្យបានត្រឹមត្រូវតាមទំនៀមទម្លាប់ ដោយសារតែចំនួនមនុស្សច្រើនពេក ពួកគាត់បានត្រឹមតែអនុញ្ញាតឲ្យដើរឆ្លងកាត់មើលព្រះបរមមេរុ ជាទីតម្កល់ព្រះបរមមញ្ជូសា រួចក៏ចេញមកវិញដោយមិនអស់ចិត្ត។
បទចំរៀងជាព្រះរាជនិពន្ធផ្ទាល់ព្រះបរមសពព្រះបាទ នរោត្តម សីហនុ ដែលមានចំណងជើងថា លាហើយកម្ពុជា ឬជាភាសាអង់គ្លេស ហ្គូដបាយ ខេមបូឌា (Good Bye Cambodia) ត្រូវបានបង្ហោះជាច្រើននៅតាមបណ្ដាញសង្គមហ្វេសបុក (Facebook) និងចាក់ផ្សាយតាមវិទ្យុ និងទូរទស្សន៍ជាច្រើន ចំថ្ងៃដែលថ្វាយព្រះភ្លើងព្រះបរមសព។
ព្រះអង្គបាននិពន្ធបទនេះតាំងពីក្នុងទសវត្សរ៍៩០ មកម្លេះ ប៉ុន្តែទើបតែត្រូវបានមហាជនចាប់អារម្មណ៍នៅគ្រាដែលអត្ថន័យបទ ចំរៀងហាក់ដូចជាព្រះរាជបណ្ដាំចុងក្រោយនៃព្រះជន្មសង្ឃារបស់ ព្រះអង្គ។
តាមអត្ថន័យបទចំរៀងព្រះបរមសពព្រះករុណា ព្រះបាទ នរោត្តម សីហនុ សន្យាថាទោះជាព្រះអង្គក្ស័យសង្ខារ ក៏នៅតែបម្រើការពារអ្នក ដែល "អ្នក" ក្នុងអត្ថន័យបទចំរៀង សំដៅទៅលើប្រជានុរាស្ត្ររបស់ព្រះអង្គ។ បទចំរៀងក៏បានបញ្ជាក់យ៉ាងច្បាស់ថា ព្រះអង្គនៅតែស្មោះត្រង់ និងស្រឡាញ់ប្រជានុរាស្ត្រជារៀងរហូត។
ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រ និងជាព្រះរាជបុត្រារបស់ព្រះបាទ នរោត្តម សីហនុ បានបួងសួងឲ្យព្រះវិញ្ញាណក្ខន្ធរបស់ទ្រង់ទៅគ្រងរាជសម្បត្តិនៅ ឋានសួគ៌ និងសូមឲ្យទ្រង់នៅរក្សាព្រះរាជាណាចក្រកម្ពុជា ជារៀងដរាប។
ក្នុងពិធីថ្វាយព្រះភ្លើងព្រះបរមសព ព្រះមហាក្សត្រក៏បានប្រទានការលើកលែងទោសដល់អ្នកទោសចំនួន ៤០៥នាក់ នៅទូទាំងប្រទេស ដើម្បីថ្វាយព្រះរាជកុសលដល់ព្រះរាជបិតារបស់ទ្រង់។ អ្នកទោស ៤០៥នាក់ មានស្រីប្រុស និងជនពិការផងនោះ បានពាក់អាវមានរូបព្រះឆាយាល័ក្ខណ៍របស់ព្រះបរមសព ព្រះករុណា ព្រះបាទ នរោត្តម សីហនុ និងបានចូលរួមក្នុងពិធីថ្វាយព្រះភ្លើង។ ព្រះមហាក្សត្រ បានប្រទានព្រះរាជអំណោយ និងថ្វាយលិខិតលើកលែងទោសដល់ពួកគេ ក្នុងពិធីនោះតែម្តង។
ព្រះមហាក្សត្រ និងព្រះមហាក្សត្រីព្រះវររាជមាតាជាតិខ្មែរ ព្រះកន្សែង និងបានទតព្រះភ័ក្ដ្រព្រះបរមសពជាលើកចុងក្រោយ មុននឹងថ្វាយព្រះភ្លើងដល់ព្រះបរមសពនៅលើបញ្ចា ៩ថ្នាក់។ ព្រះរាជពិធីនោះ មានការអុជប្រទីបជ្វាលា និងមានព្រះរាជវង្សានុវង្ស ក្សត្រា ១ព្រះអង្គ គឺព្រះបាទ នរោត្តម រណឫទ្ធិ និងយុវ័ន ៩០រូប បួសមុខភ្លើង ថ្វាយព្រះបរមសព។ ចំពោះការរើសព្រះបរមអដ្ឋិ នឹងត្រូវធ្វើនៅពេលព្រឹកថ្ងៃទី៥ ខែកុម្ភៈ៕ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.