ដោយ មុំ សុផុន
2012-11-19
ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) បានមកដល់ប្រទេសកម្ពុជា នៅម៉ោងជិត ៦ល្ងាច ថ្ងៃទី១៩ ខែវិច្ឆិកា ឆ្នាំ២០១២ ដើម្បីចូលរួមកិច្ចប្រជុំកំពូលអាស៊ានលើកទី២១ ដែលកម្ពុជាធ្វើជាប្រធានរយៈពេល ៣ថ្ងៃ ចាប់ពីថ្ងៃទី១៨ រហូតដល់ថ្ងៃទី២០ ខែវិច្ឆិកា ឆ្នាំ២០១២។ក្នុងដំណើរមកដល់របស់លោកប្រធានាធិបតីអាមេរិក នៅឯអាកាសយានដ្ឋានអន្តរជាតិភ្នំពេញ គឺមិនពិធីធំដុំនោះទេ គឺមានរដ្ឋមន្ត្រីក្រសួងអប់រំ យុវជន និងកីឡា ព្រមទាំងមន្ត្រីជាន់ខ្ពស់ជិត ១០នាក់។ ប៉ុន្តែផ្នែកសន្តិសុខបានរឹតបន្តឹងយ៉ាងខ្លាំងរាប់ទាំងនៅតាមដង វិថី និងអាកាសយានដ្ឋានផង។
លោកប្រធានាធិបតីនឹងចូលរួមកិច្ចប្រជុំកំពូល អាស៊ីបូព៌ា និងជួបជាមួយមេដឹកនាំអាស៊ាន។ អំឡុងពេលជួបប្រាស្រ័យជាមួយមេដឹកនាំកំពូលៗនៅក្នុងតំបន់ លោកប្រធានាធិបតី នឹងពិភាក្សាកិច្ចការ និងបញ្ហាផ្សេងៗ រួមមាន ការរីកចម្រើននៃសេដ្ឋកិច្ច និងការបង្កើតឲ្យមានការងារតាមរយៈបង្កើនពាណិជ្ជកម្ម និងភាពជាដៃគូ កិច្ចសហប្រតិបត្តិការផ្នែកថាមពល និងសន្តិសុខ បញ្ហាសិទ្ធិមនុស្ស ព្រមទាំងចូលរួមចែករំលែកទុក្ខកង្វល់ ផលប្រយោជន៍ និងបញ្ហាផ្សេងៗក្នុងតំបន់ និងនៅក្នុងពិភពលោកទាំងមូល។
លោកប្រធានាធិបតីសហរដ្ឋអាមេរិក លោក បារ៉ាក់ អូបាមា (Barack Obama) នឹងចាកចេញពីប្រទេសកម្ពុជា វិញនៅល្ងាចថ្ងៃទី២០ ខែវិច្ឆិកា ក្រោយពេលដែលលោកបានចូលរួមកិច្ចប្រជុំជាមួយថ្នាក់ដឹកនាំជាន់ ខ្ពស់អាស៊ាន និងវេទិកាអាស៊ីបូព៌ាជាមួយអាមេរិកនោះ៕ ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.