លោកនាយករដ្ឋមន្ត្រី ហ៊ុន សែន ថ្លែងក្នុងឱកាសចែកសញ្ញាបត្រដល់និស្សិតនៅសាកលវិទ្យាល័យ វិទ្យាសាស្ត្រសុខាភិបាល រាជធានីភ្នំពេញ។
ការប្រកាសនេះបានធ្វើឡើងនៅក្នុងពិធីប្រកាសផ្សព្វផ្សាយ របាយការណ៍នៅពាក់កណ្ដាលអាណត្តិឆ្នាំ២០១១ ស្ដីពីការអនុវត្តផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០០៩ ដល់ឆ្នាំ២០១៣។
លោកនាយករដ្ឋមន្ត្រី ហ៊ុន សែន នៅថ្ងៃទី១៤ ខែមិថុនា ឆ្នាំ២១០២ បានប្រកាសបញ្ជាឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន ដកហូត ឬកាត់ដីសម្បទានសេដ្ឋកិច្ចនៅទូទាំងប្រទេសកម្ពុជា ដែលបានធ្វើឲ្យប្រជាពលរដ្ឋបាត់បង់ដីស្រែ និងចំការកន្លងមក។
ការកាត់ និងការដកហូតដីសម្បទានសេដ្ឋកិច្ចនោះ គឺទុកបែងចែកឲ្យគ្រួសារប្រជាពលរដ្ឋដែលខ្វះខាតដីធ្លី និងបាត់បង់ដីស្រែចំការកន្លងមក។
បទបញ្ជានេះគឺជាចំហ និងជាវិធានការមួយទៀតក្រោយពីលោក ហ៊ុន សែន បានប្រកាសវិធានការរួចម្ដងហើយ កាលពីថ្ងៃទី៧ ខែឧសភា ឆ្នាំ២០១២ បញ្ជាឲ្យលោក ច័ន្ទ សារុន ផ្អាកការផ្ដល់ដីសម្បទានសេដ្ឋកិច្ចជាបណ្ដោះអាសន្នឲ្យក្រុមហ៊ុនឯកជន ក្នុងស្រុក និងក្រុមហ៊ុនបរទេស។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកសុំឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន ចាត់ការរឿងនេះឲ្យបានឆាប់ ហើយលោកចាត់ទុកថា វិធានការនេះមិនមែនជាយុទ្ធនាការទាក់ទាញសន្លឹកឆ្នោតទេ។
លោក ហ៊ុន សែន៖ «រឿងលោកឯងធ្វើអត្ថាធិប្បាយជាសិទ្ធិរបស់លោកឯង (គណបក្សប្រឆាំង) តែនេះជាសិទ្ធិអំណាចក្នុងតំណែងរបស់ខ្ញុំ បើ ហ៊ុន សែន ធ្វើជានាយករដ្ឋមន្ត្រី ប្រជាជនបានដីហើយ ឯចំពោះ NGO និងបក្សប្រឆាំងអាចត្រឹមផ្ដល់អនុសាសន៍តែគ្មានសិទ្ធិ សិទ្ធិសំរេចនៅឯណោះ (ហ៊ុន សែន)»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន បានមានប្រសាសន៍ថា មន្ត្រីជំនាញកំពុងតែចុះទៅត្រួតពិនិត្យ និងសិក្សារឿងនេះហើយ៖ «គ្រប់កន្លែងណាទាំងអស់ដែលមានដីសម្បទាន សេដ្ឋកិច្ចហ្នឹង គឺកាត់ទាំងអស់។ កន្លងមកចេះតែមានបញ្ហាដីធ្លីឲ្យបញ្ចប់បញ្ហានេះនៅលើ ១៨ខេត្ត។ យើងមិនទាន់ដឹងប្រជាជនពិតប្រាកដ កាលណាយើងដឹងប្រជាជនពិតប្រាកដ យើងបែងចែកដីទៅតាមហ្នឹង»។
អ្នកនាំពាក្យគណបក្ស សម រង្ស៊ី លោក យឹម សុវណ្ណ និងជាតំណាងរាស្ត្រ បានមានប្រសាសន៍ថា កន្លងមកប្រជាពលរដ្ឋជាង ១លាននាក់ បានរងការឈឺចាប់ដោយសារការបាត់បង់ដីស្រែចំការ ដោយសារតែក្រុមហ៊ុនឯកជនរឹបយកជាកម្មសិទ្ធិ។
លោក យឹម សុវណ្ណ៖ «ជាការចាំបាច់ដែលត្រូវតែផ្ដល់រឹបអូសពី ប្រជាពលរដ្ឋ ប្រគល់សងប្រជាពលរដ្ឋវិញ។ គណបក្ស សម រង្ស៊ី បានទាមទារម្ដងហើយម្ដងទៀត កុំឲ្យរឹបអូសដីធ្លីប្រជាពលរដ្ឋ ម្យ៉ាងវិញទៀតគឺត្រូវតែបញ្ឈប់ដីសម្បទានទៅឲ្យក្រុមបរទេស និងក្រុមហ៊ុនឯកជនមួយចំនួននៅក្នុងប្រទេស»។
កាលពីឆ្នាំ២០១១ កន្លងទៅនេះ រដ្ឋាភិបាលកម្ពុជា បានផ្ដល់អាជ្ញាប័ណ្ណដីសម្បទានសេដ្ឋកិច្ចឲ្យក្រុមហ៊ុនឯកជនចំនួនជិត ២០ ស្មើនឹងដីសម្បទានសេដ្ឋកិច្ចទំហំសរុបជាង ១លានហិកតារ នៅខេត្តចំនួន ១៧ នៅទូទាំងប្រទេសកម្ពុជា។
ក្រុមហ៊ុនឯកជនទាំងនោះមកពីប្រទេសចិន វៀតណាម កូរ៉េខាងត្បូង ថៃ ម៉ាឡេស៊ី ឥណ្ឌា និងប្រទេសសិង្ហបុរី៕
Hello, my name is Jack Sparrow. I'm a 50 year old self-employed Pirate from the Caribbean.