សុខភាព អៀង សារី​មិន​ធូរស្បើយ​វិញ​ទេ មាន​តែ​កាន់​តែ​ធ្ងន់ធ្ងរ​ទៅៗ

ភ្នំពេញៈ សុខភាព​របស់​លោក អៀង សារី អតីត​ឧប​នាយក​រដ្ឋ​មន្រ្តី​ក្នុង​របប​ខ្មែរ​ក្រហម​នឹង​មិន​ធូរស្បើយ​ទេ ហើយ​ «ការ​ធ្វើ​ឲ្យ​សុខភាព​គាត់​មាន​លំនឹង​» ជា​មធ្យោបាយ​ល្អ​បំផុត ដែល​អាច​សង្ឃឹម​បាន។ នេះ​បើ​តាម​វេជ្ជបណ្ឌិត ថ្លែង​ប្រាប់​ចៅក្រម នៅ​សាលាក្តី​ខ្មែរ​ក្រហម កាល​ពី​ម្សិលមិញ។

ក្នុង​អំឡុង​សវនាការ​ដ៏​ខ្លី​មួយ ដែល​បាន​ផ្អាក​នៅ​ពាក់​កណ្តាល​ព្រឹក ​កាល​ពី​ម្សិលមិញ លោក អៀង សារី ស្ថិត​ក្នុង​មន្ទីរ​ឃុំឃាំង ដែល​កំពុង​មាន​ជំងឺ​រលាក​ទង​សួត​នា​ពេល​ថ្មីៗ​នេះ ដែល​ជំងឺ​នេះ​ត្រូវ​ការ​រយៈ​ពេល ដើម្បី​ព្យាបាល​នៅ​មន្ទីរ​ពេទ្យ​មិត្តភាព​ខ្មែរ-សូវៀត។

លោក លីម ស៊ីវុធ វេជ្ជបណ្ឌិត​ដែល​ព្យាបាល​លោក អៀង សារី បាន​ប្រាប់​តុលាការ​ថា៖ «​យើង​បាន​ពិភាក្សា​ក្នុង​ចំណោម​អ្នក​ឯកទេស​វេជ្ជសាស្រ្ត​ហើយ យើង​បាន​ធ្វើ​រោគ​វិនិច្ឆ័យ​និង​រក​ឃើញ​ថា ​ស្ថាន​ភាព​សុខភាព​គាត់​មិន​អាច​ល្អ​ប្រសើរ​ឡើយ។ ​សុខភាព​គាត់​អាច​ត្រឹម​ធ្វើ​ឲ្យ​មាន​លំនឹង​ ហើយ​នឹង​កាន់​តែ​ធ្ងន់ធ្ងរ​ជាង​នេះ»។

លោក លីម ស៊ីវុធ បាន​ណែនាំ​ឲ្យ​អតីត​រដ្ឋ​មន្រ្តី​ការ​បរទេស​ក្នុង​របប​ខ្មែរ​ក្រហម​ដេក សម្រាក២ ថ្ងៃ ​បន្ទាប់​មក ក្នុង​ពេល ​១ សប្តាហ៍ លោក អៀង សារី អាច​ចូល​រួម​ក្នុង​សវនាការ​បានពី​ចម្ងាយ​ពី​បន្ទប់​ឃុំ​របស់ លោក​ប៉ុណ្ណោះ។

លោក លីម ស៊ីវុធ បាន​លើក​ឡើង​ថា៖ «​គាត់​នៅ​ជិត​វេជ្ជបណ្ឌិត​នៅ​ទីនោះ ដែល​ងាយ​ឃ្លាំ​មើល​សុខ​ភាព​របស់​គាត់​»។ លោក​បាន​បង្ហាញ​ថា វេជ្ជបណ្ឌិត​ចង់​មាន​លទ្ធភាព​វាយ​តម្លៃ​សុខភាព​របស់​គាត់​ជា​ប្រចាំ ថ្ងៃ។

លោក Michael Karnavas ​មេធាវី លោក អៀង សារី មិន​ស្រួល​ចិត្ត​ចំពោះ​ស្ថានភាព​សុខភាព​ផ្លូវ​ចិត្ត​របស់​កូន​ក្តី​ឡើយ បន្ទាប់​ពី​បាន​បញ្ជូន​ឲ្យ​សម្រាក​នៅ​មន្ទីរពេទ្យ។

លោក Karnavas បាន​ថ្លែងថា៖ « គាត់ [អៀង សារី] បាន​ជូន​ដំណឹង​យើង ​ហើយ​ខ្ញុំ​ទំនង​ជា​ឲ្យ​តម្លៃ​លើ​ការ​អះអាង​របស់​គាត់​ថា ជាង​៥​នាទី​ [បន្ទាប់​ពី​អង្គុយ] គាត់​ចាប់​ផ្តើម​វិល​មុខ គាត់​មិន​អាច​មាន​វត្ត​មាន​​នៅទី​នេះ​ទេ ហើយ​គាត់​បាន​បង្ហាញ​ថា គាត់​គិត​ថា គាត់​មិន​អាច​ផ្តោត​អារម្មណ៍​បាន​លើស​៥នាទី ដោយ​មិន​វិល​មុខ​នោះ​ឡើយ»។

នៅ​ពេល​មេធាវី​ដើម​បណ្តឹង​រដ្ឋប្បវេណី​សួរ​វេជ្ជបណ្ឌិត​ដែល​ព្យាបាល លោក អៀង សារី ថា​តើ ​អាការ​វិល​មុខ​នេះ​អាច​មាន​រយៈពេល​ប៉ុន្មាន លោក លីម ស៊ីវុធ បាន​ថ្លែង​ថា វា​ពិបាក​និយាយ។

លោក​បាន​លើក​ឡើង​ថា៖ «គាត់​មិនមែន​ជា​មនុស្ស​ដែល​មាន​សុខភាព​ល្អ​ទេ ដូច្នេះ​គាត់​វិល​មុខ​ញឹក​ញាប់​ បើ​គិត​ពី​សុខភាព​និង​វ័យ​របស់​គាត់»។ លោក​បន្ត​ថា ជំងឺ​បេះដូង​របស់​លោក អៀង សារី កើត​តាំង​ពី​ឆ្នាំ ១៩៩២ មក ហើយ​ជំងឺ​រ៉ាំរ៉ៃ​នេះ ហាក់​ដូចជា​កាន់​តែ​ធ្ងន់ធ្ងរ​ទៅ​ៗ។

អ្នក​ស្រី អៀង ធីរិទ្ធ ប្រពន្ធ​គាត់​ត្រូវ​បាន​ផ្តាច់​ចេញ​ពី​សវនាការ​ក្នុង​សំណុំ​រឿង ០០២ ហើយ ព្រោះ​វេជ្ជបណ្ឌិត​សន្និដ្ឋាន​ថា គាត់​មាន​ជំងឺ​វង្វេង​វង្វាន់៕ TK

Phnom Pehn  Post