សម្ដេចក្រុមព្រះ នរោត្តម រណឫទ្ធិ និង លោក
ញ៉ឹក ប៊ុនឆៃ ក្នុងពិធីចុះហត្ថលេខារួមគ្នា កាលពីព្រឹកថ្ងៃទី២៤
ខែឧសភា ឆ្នាំ២០១២ នៅទីស្ដីការគណៈរដ្ឋមន្ត្រី វិមានសន្តិភាព។
RFA 2012-05-25
បន្ទាប់ពីបានបែកបាក់គ្នាអស់ជាច្រើនឆ្នាំមក
គណបក្សហ៊្វុនស៊ិនប៉ិច និងគណបក្ស នរោត្តម
រណឫទ្ធិបានសម្រេចរួបរួមគ្នាវិញ នៅថ្ងៃទី២៤ ឧសភា ឆ្នាំ២០១២
គឺធ្វើឡើងក្នុងរយៈពេលជាងមួយសប្ដាហ៍ប៉ុណ្ណោះ
មុនថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់។
ការរួបរួមគ្នាឡើងវិញដែលធ្វើឡើងនៅពេលនេះ បានធ្វើឲ្យអ្នកវិភាគនយោបាយក្នុងស្រុក វិភាគក្នុងទស្សនៈខុសៗគ្នា។ ខ្លះអះអាងថា ដោយសារសម្ពាធនយោបាយពីបរទេស ខ្លះទៀតថា ការរៀបចំនេះ ធ្វើឡើងដោយគណបក្សប្រជាជនដែលជាបក្សកាន់អំណាច ដែលមានសំឡេងច្រើននៅក្នុងសភាសព្វថ្ងៃ។
លោក បណ្ឌិត ឡៅ ម៉ុងហៃ អ្នកវិភាគឯករាជ មានប្រសាសន៍ថា ហ៊្វុនស៊ិនប៉ិច និងបក្ស នរោត្តម រណឫទ្ធិ រួបរួមគ្នានេះ មិនមែនជារឿងចៃដន្យទេ គឺពិតជាមានគម្រោងរៀបចំទុកជាមុនដែលទាក់ទងរវាងបក្សកុម្មុយនិស្ត ចិន ជាមួយបក្សទាំងពីរនេះ។ ក្រៅពីនេះ លោក ឡៅ ម៉ុងហៃ បានបង្ហើបថា សម្ពាធនៃឥទ្ធិពលបក្សនយោបាយមួយនៅក្នុងប្រទេស ក៏បានលើកទឹកចិត្តឲ្យបក្សទាំងពីរនេះ ជួបជុំគ្នាវិញដែរ ក៏ប៉ុន្តែលោកមិនបានបញ្ជាក់ឈ្មោះបក្សនយោបាយនោះទេ។
ចំណែក លោក បណ្ឌិត សុខ ទូច អ្នកវិភាគឯករាជដែរនោះ យល់ផ្ទុយពីនេះ។ លោកថា បើសិនជាចិនលូកដៃចូលក្នុងរឿងនេះ មិនធ្វើតាមវិធីចំហដូច្នេះទេ គឺអាចធ្វើវិធីផ្សេង។ ក៏ប៉ុន្តែ លោក សុខ ទូច បានយល់ស្របជាមួយលោក ឡៅ ម៉ុងហៃ ថា ការបង្រួបបង្រួមនេះអាចជាឆាកនយោបាយ រៀបចំដោយបក្សមានឥទ្ធិពលមួយនៅក្នុងប្រទេស។ ដូចលោក ឡៅ ម៉ុងហៃ ដែរ លោក សុខ ទូច បដិសេធមិនបញ្ចេញឈ្មោះគណបក្សនោះទេ។
នៅមុនឆ្នាំ២០០៨ គណបក្សហ៊្វុនស៊ិនប៉ិច និងគណបក្សប្រជាជនកម្ពុជា បានចងសម្ព័ន្ធភាពជាមួយគ្នា បង្កើតរដ្ឋាភិបាលមួយ។ តែក្រោយមក បក្សហ៊្វុនស៊ិនប៉ិច ចុះខ្សោយរហូតដល់បែកបាក់គ្នា។ បន្ទាប់មក សម្ដេច ក្រុមព្រះ នរោត្តម រណឫទ្ធិ ត្រូវបានកូនចៅទម្លាក់ពីដំណែងជាប្រធានបក្ស រួចក៏បង្កើតបក្សថ្មីមួយទៀត ដោយដាក់ឈ្មោះព្រះអង្គផ្ទាល់ មកទល់សព្វថ្ងៃ។ រីឯមន្ត្រីតំណាងគណបក្សនយោបាយខ្លះនៅក្នុងស្រុក ដែលកំពុងចូលរួមបោះឆ្នោតឃុំ-សង្កាត់ នៅពេលនេះបានអះអាងដោយត្រង់ៗថា ការបង្រួបបង្រួមបក្សហ៊្វុនស៊ិនប៉ិច និងបក្ស នរោត្តម រណឫទ្ធិ ពេលនេះ គឺដោយសារកត្តាពីរសំខាន់ គឺដោយសារបក្សទាំងពីរមិនសង្ឃឹមថានឹងឈ្នះឆ្នោតបាន និងដោយសារយុទ្ធសាស្ត្ររបស់គណបក្សប្រជាជនកម្ពុជា រៀបចំបំបែកសន្លឹកឆ្នោត របស់គណបក្ស សម រង្ស៊ី និងគណបក្សសិទ្ធិមនុស្ស។
ជាអាទិ៍ លោក កឹម សុខា ប្រធានគណបក្សសិទ្ធិមនុស្ស ក៏យល់ប្រហាក់ប្រហែលគ្នា។ ចំណែកលោក យឹម សុវណ្ណ អ្នកនាំពាក្យបក្ស សម រង្ស៊ី ក៏អះអាងស្រដៀង លោក កឹម សុខា ដែរ ដោយលោកបានចោទតំណាងគណបក្សទាំងពីរដែលរួបរួមគ្នានេះដោយត្រង់ៗថា ជាឧបករណ៍របស់គណបក្សប្រជាជនតែម្ដង។
គណបក្សប្រជាជនបានរងនូវការចោទប្រកាន់ថា បានបំបែកបំបាក់គណបក្សនយោបាយនានាកន្លងមក មន្ត្រីគណបក្សប្រជាជនបានបដិសេធ នៃការចោទប្រកាន់ទាំងនោះតែជាបន្តបន្ទាប់៕
Hello, my name is Jack Sparrow. I'm a 50 year old self-employed Pirate from the Caribbean.