ដោយ វោហារ ជាតិ
2010-07-22;
យុវជនយុវនារីខ្មែរជាច្រើនម៉ឺននាក់ ត្រូវបានអង្គការខ្មែរក្រហមចាប់បង្ខំឲ្យយកគ្នាជាប្ដីប្រពន្ធ ដោយមិនបានរៀបការតាមប្រពៃណីខ្មែរ ដែលមានតាំងពីដូនតាយូរលង់ណាស់មកហើយនោះទេ។
Photo courtesy of DC-Cam
ពិធីរៀបការរបស់ខ្មែរក្រហម
ពិធីរៀបការតាមរបបនយោបាយកុម្មុយនិស្តថ្មីបែបលទ្ធិម៉ៅនិយម ដែលគេរៀបការម្តងៗមានចំនួនមនុស្សចាប់ពី ២០គូ ដល់ ១០០គូ។ អង្គការខ្មែរក្រហមមិនអនុញ្ញាតឲ្យកូនកំលោះក្រមុំស្ម័គ្រចិត្តរើស គូប្រចាំជីវិតដោយខ្លួនឯងទេ គឺអង្គការផ្គូផ្គងគូស្រករដែលពួកគេមិនដែលស្គាល់គ្នា ឬក៏មិនបានស្រឡាញ់គ្នា ហើយបើអ្នកណាម្នាក់ហ៊ានប្រកែក អង្គការចោទថាខ្មាំងប្រឆាំងបដិវត្ត ហើយត្រូវកងឈ្លបខ្មែរក្រហមចាប់ចងស្លាបសេកយកទៅសម្លាប់ចោល។
ចម្រៀងខ្មែរក្រហមមួយបទៗសុទ្ធសឹងតែបង្កប់ទៅដោយពាក្យក្រេវក្រោធ ម៉ឺងម៉ាត់ ចងកំហឹងជាមួយខ្មាំង ដែលភាគច្រើនជាប្រជាជនខ្មែរគ្នាឯង។ គ្មានទេពាក្យលួងលោម មនោសញ្ចេតនា គ្រួសារ ស្នេហាអូនបង មានតែពាក្យប្ដេជ្ញា លះបង់ទាំងជីវិត សូម្បីតែមនោសញ្ចេតនាស្នេហារបស់យុវជនយុវនារី ក៏អង្គការដកហូតដែរ ពោលគឺជីវិតរស់នៅរបស់ប្រជាជនខ្មែរក្នុងរបប ពុល ពត កាន់អំណាចពីឆ្នាំ១៩៧៥ ដល់ឆ្នាំ១៩៧៩ គឺអ្វីៗទាំងអស់ដើម្បីតែអង្គការបដិវត្តដ៏ក្រហមឆ្អិនឆ្អៅតែមួយ គត់។
សាក្សីនិងភស្តុតាងជាច្រើនបង្ហាញថា យុវជនយុវនារីសម័យខ្មែរក្រហមគ្រប់គ្រងប្រទេសជាច្រើនម៉ឺននាក់ ត្រូវអង្គការខ្មែរក្រហមចាប់ផ្សំផ្គុំជាប្ដីប្រពន្ធតាមមនោគម បដិវត្តមហាលោតផ្លោះ មហាអស្ចារ្យ ខុសប្រពៃណីខ្មែរដែលការរៀបអាពាហ៍ពិពាហ៍នោះមិនមានភ្លេងភ្លាត់ មេបាចៅមហាអីទាំងអស់ មានតែមេខ្មែរក្រហមពីរបីនាក់តែប៉ុណ្ណោះជាអធិបតីភាព ហើយការប្ដេជ្ញាចិត្តគោរពតាមអង្គការបក្សប៉ុណ្ណោះ។
ឯកសារជាច្រើនបង្ហាញថា ការចាប់រៀបការដោយបង្ខំ ដែលភាសាបដិវត្តខ្មែរក្រហមកាលណោះហៅថា «បើកវគ្គ» ធ្វើឡើងម្តងៗចាប់ពីជាង ២០គូឡើងទៅដល់ ១០០គូ។ ការរៀបគូស្រករដោយបង្ខំនោះ ធ្វើឡើងក្នុងគោលបំណងបង្កើតមនុស្សថ្មីដែលមានខួរក្បាលបដិវត្តន៍ ដាច់ខាត ដើម្បីបម្រើឲ្យអង្គការ និងមិនមែនដើម្បីជាសុភមង្គលគ្រួសារប្រជាជននោះទេ។
បៅ សេង អាយុជាង ៦០ឆ្នាំ នៅក្នុងទៅរាជធានីភ្នំពេញ ដែលកាលនោះអង្គការខ្មែរក្រហមចាប់បង្ខំឲ្យយកប្ដីដែលខ្លួនមិន ស្គាល់ បានរំឭកថា ៖ «ខ្ញុំដូចជាអត់ចង់បានអីទេប្ដីហ្នឹង ជំនាន់ហ្នុងដូចជាអត់ តែគេបង្ខំ ខ្លាចគេវ៉ៃចោល។ (គេរៀប) ៣០តួម្ដង។ មានស្អីគ្រាន់តែយើងប្ដេជ្ញាហើយអីហើយ គេឲ្យហូបបាយមួយពេល ហើយគេឲ្យដូងខ្ចីមួយ កន្ទេលកក់មួយ»។
របបខ្មែរក្រហម ឬរបប ប៉ុល ពត ដែលគេហៅជាផ្លូវការថា របបកម្ពុជាប្រជាធិបតេយ្យ កាន់អំណាចពីឆ្នាំ១៩៧៥ ដល់ឆ្នាំ១៩៧៩ គឺជារបបកុម្មុយនិស្តផ្ដាច់ការមួយ ដែលបណ្ដាលឲ្យប្រជាជនខ្មែរស្លូតត្រង់ជិត ២លាននាក់ត្រូវស្លាប់ដោយសារធ្វើការបាក់កម្លាំង មិនមានថ្នាំសង្កូវព្យាបាល ស្លាប់ដោយសារដាច់បាយ និងត្រូវគេវាយសម្លាប់ដោយត្បូងចប ឬគល់ឫស្សី ដោយចោទថា ជាខ្មាំងប្រឆាំងបដិវត្ត គណៈដែលប្រទេសនានាជឿនលឿន និងគោរពសិទ្ធិមនុស្សលើសកលលោកក្នុងសតវត្សរ៍ទី២០ កំពុងប្រឹងប្រែងអភិវឌ្ឍប្រទេសជាតិ លើកស្ទួយជីវភាពប្រជាជនរបស់គេឲ្យបានប្រសើរ។
សន សាង អាយុ ៥៥ឆ្នាំ នៅភូមិត្រវែង ស្រុកសំរោងទង ខេត្តកំពង់ស្ពឺ មានប្រសាសន៍ថា គាត់ត្រូវអង្គការខ្មែរក្រហមបង្ខំឲ្យយកប្ដីនៅឆ្នាំ១៩៧៨ ដែលកាលនោះមានចំនួនជាង ២0គូ តែមានអ្នកខ្លះបដិសេធត្រូវកងឈ្លបចាប់ខ្លួន ហើយអ្នកខ្លះទៀតសម្លាប់ខ្លួនឯង ព្រោះមិនពេញចិត្តគូស្រករខ្លួន។
លោក សន សាង បានឲ្យដឹងថា ៖ «រៀបការកាលស្រករខ្ញុំហ្នឹង ២៥គូ កាលរៀបហ្នឹង សម្លមួយខ្ទះ គេវ៉ៃជ្រូកមួយ ហើយបាញ់នឿកមួយខ្ទះ។ គេប្ដេជ្ញាឲ្យស្រឡាញ់គ្នាអស់មួយជីវិត»។
គ្រួសារប្តីប្រពន្ធថ្មីដែលរៀបចំដោយអង្គការនោះ ត្រូវបានអង្គការពិនិត្យតាមដានយ៉ាងយកចិត្តទុកដាក់ បន្ទាប់ពីបានផ្សំផ្គុំអស់រយៈពេលខ្លី ២ ឬ ៣ម៉ោងរួចមក ដោយអង្គការខ្មែរក្រហមចាត់តាំងកងឈ្លបតាមដានស៊ើបការណ៍ការផ្សំ ដំណេករបស់គូស្រករទាំងនោះយ៉ាងដិតដល់បំផុត។
សន សាង បន្ថែមថា ៖ «ខ្លះប្រកែកដែរ។ ផ្ទះមួយឈ្លបពីរនាក់ៗ។ ឈ្លបនៅក្រោមផ្ទះ ដល់ខ្ញុំចុះក្រោមឃើញឈ្លបនៅក្រោមផ្ទះពីរនាក់។ បើយើងចេះតែក្ដុងក្ដាំងឈ្លបគេមកណែនាំយើងដែរ។ ខ្ញុំអត់មានអីទេ ចេះតែស្ងាត់ៗអ៊ីចឹងទៅ។ បើយើងប្រកែកគេយកទៅសម្លាប់ចោល»។
មានសាក្សីជាច្រើនទៀតបានអះអាងប្រហាក់ប្រហែលគ្នានេះដែរ។
ម៉ែន ហ៊ន អាយុ ៥០ឆ្នាំ នៅស្រុកសំរោងទង ខេត្តកំពង់ស្ពឺ ដែលខ្មែរក្រហមបង្ខំឲ្យរៀបការឆ្នាំ១៩៧៥ ដែរនោះ បញ្ជាក់បន្ថែម ៖ «ថ្ងៃ ហ្នឹងមានម្នាក់អត់ស្រលាញ់គ្នា អត់ពេញចិត្តខាងប្រុស ...រត់ចុះរត់ឡើងទៅចងកសម្លាប់ខ្លួននៅដើមអំពិល»។
លោក ឆាំង យុ ប្រធានមជ្ឈមណ្ឌលឯកសារកម្ពុជា ដែលអះអាងថា មន្ត្រីមជ្ឈមណ្ឌលរបស់លោកបានសិក្សាស្រាវជ្រាវពីរឿងខ្មែរក្រហម បង្ខំប្រជាជនរៀបការនេះថា សាមីខ្លួនភាគច្រើនលើសលប់មិនបានពេញចិត្តដៃគូជីវិតដែលខ្មែរ ក្រហមរៀបឲ្យនោះទេ តែពូកគេមិនហ៊ានប្រកែក ព្រោះខ្លាចអង្គការចោទថា ខ្មាំង ហើយសម្លាប់ចោល។
ទាក់ទងនឹងការរៀបអាពាហ៍ពិពាហ៍ក្នុងរបបខ្មែរក្រហមនោះ មតិខ្លះបានលើកឡើងថា គឺជាការកសាងជីវិតមនុស្សថ្មី បដិវត្តន៍ថ្មី ដែលមានខួរក្បាលគោរពបក្ស និងប្រជាជនកុម្មុយនិស្តដាច់ខាត ក៏ប៉ុន្តែលោក ឆាំង យុ បានអះអាងថា គេមិនទាន់ហ៊ានសន្និដ្ឋានជាផ្លូវការណាមួយថា តើការរៀបអាពាហ៍ពិពាហ៍របស់ខ្មែរក្រហមនោះ គឺជាការបង្កើតបដិវត្តន៍ថ្មី ឬក៏យ៉ាងណានោះទេ។
លោក ឆាំង យុ មានប្រសាសន៍ដូច្នេះ ៖ «ខ្មែរក្រហមហាក់ដូចជានៅ ក្នុងស្ថានភាពមួយដែលប្រឈមនឹងការវាយលុករបស់វៀតណាម អ៊ីចឹងហើយកម្លាំងទាំងអស់គឺថា ត្រូវបញ្ជូនទៅសមរភូមិមុខដើម្បីបង្កបង្កើនផល ដូច្នេះគ្មានប្រការណាមួយដែលបញ្ជាក់ថា ការរៀបអាពាហ៍ពិពាហ៍នេះដើម្បីកសាងមនុស្សថ្មីទេ។ ទី២ទៀត យើងក៏ពិបាកវិនិច្ឆ័យដែរ ដោយសារផែនការ ៤ឆ្នាំនេះមិនទាន់ត្រូវបានបញ្ចប់ អ៊ីចឹងយើងពិបាកវាយតម្លៃណាស់»។
យ៉ាងណាក្ដី របបប្រល័យពូជសាសន៍ ប៉ុល ពត បានដួលរលំនៅឆ្នាំ១៩៧៩ ដោយកងទ័ពវៀតណាម លុកលុយ។ ភ្លាមៗនោះដែរ ប្ដីប្រពន្ធដែលខ្មែរក្រហមបានផ្សំផ្គុំភាគច្រើន ក៏បានលែងលះគ្នាផងដែរ ហើយសិទ្ធិសេរីភាពនៃជំនឿមនោសញ្ចេតនាស្នេហា ដែលអង្គការខ្មែរក្រហមបានបំបិទសិទ្ធិជាង ៣ឆ្នាំមកហើយនោះ ក៏បានកើតមាននៅក្នុងអារម្មណ៍របស់ពលរដ្ឋខ្មែរយើងផងដែរ។
ទោះជាយ៉ាងណាក្ដី គេសង្កេតឃើញថា ក៏មានប្ដីប្រពន្ធខ្លះដែលខ្មែរក្រហមបានរៀបការឲ្យនោះ នៅតែស្រលាញ់គ្នាមកទល់នឹងពេលនេះ ហើយថែមទាំងបង្កើតកូនពូនជាចៅច្រើននាក់ទៀតផង។ ជាអាទិដូចជាអ្នកស្រី បៅ សេង ជាដើម ៖ «ខ្ញុំតែរៀបការហើយមកជា គូព្រេងរបស់យើងហើយ»។
អ្នកវិភាគសង្គមនយោបាយខ្មែរអះអាងថា របប ប៉ុល ពត ដែលដួលរលំឆាប់ៗដូច្នេះ គឺព្រោះតែរបបនេះជារបបទមិឡឥតសាសនា សម្លាប់មនុស្សរង្គាល ហើយជាទូទៅប្រជាពលរដ្ឋខ្មែរមានជំនឿថា គូស្រករដែលខ្មែរក្រហមរៀបការឲ្យនោះ គឺមានជំនឿផ្សេងៗគ្នា។ ឧទាហរណ៍ ការលែងលះគ្នាក្រោយពីរបបនេះដួលរលំនៅឆ្នាំ១៩៧៩នោះ គឺជាគូកម្ម ចំណែកឯគូស្រករដែលរស់នៅជាមួយគ្នារហូតមកដល់សព្វថ្ងៃនេះ គឺជាគូព្រេងពីអតីតជាតិទៅវិញ។ ក៏ប៉ុន្តែក្រុមអ្នកច្បាប់ថ្លែងថា ការបង្ខំមនុស្សឲ្យរៀបការក្នុងរបបខ្មែរក្រហមនេះ គឺជាទោសឧក្រិដ្ឋមួយក្នុងចំណោមទោសឧក្រិដ្ឋផ្សេងៗទៀត ដែលគួរតែដាក់បន្ទុកលើមេដឹកនាំខ្មែរក្រហម ដែលកំពុងតែជាប់ឃុំក្នុងសាលាក្ដីខ្មែរក្រហមសព្វថ្ងៃនេះ ដើម្បីរកយុត្តិធម៌ឲ្យជនរងគ្រោះ៕
Hello, my name is Jack Sparrow. I'm a 50 year old self-employed Pirate from the Caribbean.