អង្គជំនុំជម្រះសាលាដំបូងនៃសាលាក្ដីខ្មែរក្រហម ចេញសេចក្ដីជូនដំណឹងជាថ្មីនៅថ្ងៃទី៦ មីនា ថា ខ្លួនមិនទាន់អាចធ្វើសវនាការស្ដាប់សក្ខីកម្មរបស់អ្នកជំនាញអន្តរជាតិ ឈ្មោះ ហ្វីលីព ហ្សត (Philip Short) និង អេលីហ្សាប៊ែត ប៊ែគឃើរ (Elizabeth Becker) បានទេ ដោយសារតែជនជាប់ចោទ អៀង សារី ឈឺចូលមន្ទីរពេទ្យមិនទាន់ដឹងថា ពេលណាគាត់ត្រូវត្រឡប់មកមន្ទីរឃុំឃាំងវិញឡើយ។
មេធាវីការពារក្ដីលោក អៀង សារី គឺលោក អាង ឧត្ដម ថ្លែងថា គ្រូពេទ្យនៅមិនទាន់បញ្ជាក់បាននៅឡើយទេ ហើយស្ថានភាពជំងឺរបស់កូនក្ដីលោក ក៏មិនទាន់ធូរស្បើយដែរ៖ «ថាអីមិនត្រូវ មិនដឹងថាយ៉ាងម៉េច ព្រោះមិនដឹងជាធ្ងន់ធ្ងរប៉ុណ្ណា អត់ដឹងអត់ហ៊ានប្រមាណ អត់ហ៊ានថា។ បញ្ហាឥឡូវរឿងក្រពះ។ យើងដាក់អាហារទៅអត់បាន? ដាក់ទៅក្អួតៗ។ ពេទ្យបន្ថយអាហារបន្ថយទឹកអស់ហើយ តឹងតែពោះ។ មនុស្សយើងរស់នឹងអាហារ ដល់អាហារមិនកើតមិនដឹងយ៉ាងម៉េច។ ពេទ្យគេបន្ថែមអាហារតាមសេរ៉ូមអីអត់ដឹងដែរ»។
សេចក្ដីប្រកាសរបស់សាលាដំបូងបន្តថា ខ្លួននឹងមិនធ្វើសវនាការស្ដាប់សាក្សីណាបន្ថែមទៀតទេ នៅមុនពេលមានសេចក្ដីសម្រេចថ្មី អំពីការបំបែកកិច្ចដំណើរការនីតិវិធី។ សេចក្ដីសម្រេចនេះ គឺទាក់ទងនឹងភស្តុតាងវាយតម្លៃរបស់គ្រូពេទ្យលើសុខភាពរបស់ជនជាប់ចោទ អៀង សារី និង នួន ជា ក្នុងការចូលរួមសវនាការ។ សវនាការនេះ ត្រូវបានកំណត់ធ្វើ នៅថ្ងៃទី២៥ ខែមីនា ឆ្នាំ២០១៣។ បន្ទាប់មក អង្គជំនុំជម្រះនឹងជូនដំណឹងអំពីពេលធ្វើសវនាការឡើងវិញ។
ដោយឡែក បញ្ហាធ្វើពហិការរបស់ក្រុមអ្នកប្រែទាមទារប្រាក់ខែ ក៏ជាមូលហេតុដែលសាលាក្ដីមិនអាចធ្វើសវនាការបានដែរ ហើយមកដល់ពេលនេះ មិនទាន់មានដំណោះស្រាយអ្វីនៅឡើយទេ។
ទន្ទឹមគ្នានេះ គណៈកម្មាធិការប្រព្រឹត្តិកម្មនៃអង្គការសមាគមសិទ្ធិមនុស្សកម្ពុជា ចំនួន ២១អង្គការ បានចេញសេចក្ដីប្រកាសព័ត៌មានមួយដោយសម្ដែងការព្រួយបារម្ភចំពោះកង្វះថវិកា ដែលមិនទាន់ដោះស្រាយនេះ។ គណៈកម្មាធិការនេះ អំពាវនាវឱ្យអង្គការសហប្រជាជាតិបន្តកិច្ចសហការ និងថវិកាដល់សាលាក្ដីកូនកាត់មួយនេះទៀត៕ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.