ដោយ វោហារ ជាតិ
2013-01-26
ក្រសួងការបរទេសកម្ពុជា បានប្រកាសព័ត៌មានអំពីថ្នាក់ដឹកនាំបរទេស ដែលនឹងអញ្ជើញចូលរួមព្រះរាជពិធីថ្វាយព្រះភ្លើង ព្រះបរមសព ព្រះករុណា ព្រះមហាវីរក្សត្រ នរោត្តម សីហនុ នៅថ្ងៃទី៤ កុម្ភៈ ឆ្នាំ២០១៣ ខាងមុខនេះ។
២៥-មករា-២០១៣៖ ព្រះមេរុត្រៀមសម្រាប់តម្កល់ព្រះបរមរតនកោដ្ឋ ក្នុងព្រះរាជពិធីថ្វាយព្រះភ្លើង ព្រះបរមសព ព្រះករុណា ព្រះមហាវីរក្សត្រ នរោត្តម សីហនុ នៅថ្ងៃទី៤ ខែកុម្ភៈ ឆ្នាំ២០១៣។
ក៏ប៉ុន្តែ ក្នុងបញ្ជីឈ្មោះថ្នាក់ដឹកនាំនោះ គេមិនឃើញមានវត្តមានថ្នាក់ដឹកនាំប្រទេសកូរ៉េខាងជើង ដែលធ្លាប់ជាមិត្តជិតស្និទ្ធរបស់ព្រះមហាវីរក្សត្រ និងសែរាជវង្សានុវង្សបរទេស ទេ លើកលែងតែសែរាជវង្សប្រទេសជប៉ុន តែប៉ុណ្ណោះ។
សេចក្ដីជូនដំណឹងក្រសួងការបរទេសកម្ពុជា ចុះថ្ងៃទី២៥ មករា បានបង្ហាញថា មកដល់ពេលនេះមានថ្នាក់ដឹកនាំបរទេសជិត ១៥ប្រទេស ដែលនឹងអញ្ជើញចូលរួមពិធីព្រះរាជពិធីថ្វាយព្រះភ្លើង ព្រះបរមសព ព្រះករុណា ព្រះមហាវីរក្សត្រ នរោត្តម សីហនុ។
ថ្នាក់ដឹកនាំទាំងនោះ មានដូចជា៖
-លោក ជា ឈីងលីន (Jia Qinglin) ប្រធានសភាប្រឹក្សានយោបាយប្រទេសចិន។
-ប្រធានាធិបតីប្រទេសបារាំង លោក ហ្សង់ម៉ាក អៃរ៉ូល (Jean-Marc Ayraul)។
-លោក ង្វៀន តាំងយុង (Nguyen Tan Dung) នាយករដ្ឋមន្ត្រីប្រទេសវៀតណាម។
-អ្នកស្រី យីងឡាក់ ស៊ីណាវ៉ាត់ (Yinggluck Shinawatra) នាយករដ្ឋមន្ត្រីប្រទេសថៃ។
-លោក ថងស៊ីន ថាំម៉ាវង់ (Thongsing Thammavong) នាយករដ្ឋមន្ត្រីប្រទេសឡាវ។
-លោក ជេចូម៉ារ ប៊ីណាយ (Jejomar C. Binay) អនុប្រធានាធិបតីហ្វីលីពីន។
-ព្រះអង្គម្ចាស់ អាគីស៊ីណូ (Prince Akishino) នៃប្រទេសជប៉ុន។
-លោក ថាមែន សានមូហ្គា រ៉ាថណាម (Thaman Shamugaratman) ឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុប្រទេសសិង្ហបុរី។
-លោក ប៉េទីន ដាតូ ស៊ូយ៉ស ហាជី អូស្មាន (Pehin Dato Suoi Haji Osman) រដ្ឋមន្ត្រីក្រសួងអភិវឌ្ឍន៍ប្រទេសប្រ៊ុយណេដារូសាឡាម។
-លោកសេនាប្រមុខទ័ពជើងអាកាស ដ្យូកូ ស៊ូយ៉ាន់តូ រដ្ឋមន្ត្រីកិច្ចការនយោបាយ ច្បាប់ និងសន្តិសុខឥណ្ឌូណេស៊ី។
-លោក ទីន ណាំង ថេន (Tin Naing Thein) ទេសរដ្ឋមន្ត្រីទទួលបន្ទុកការិយាល័យប្រធានាធិបតីប្រទេសមីយ៉ាន់ម៉ា (ភូមា)។
-លោក ហា គុមលូល (HA Kum-Loul) ប្រធានសេនាធិការរបស់ប្រធានាធិបតីកូរ៉េខាងត្បូង និងលោក ចន សេនឌឺសាន់ (John Sanderson) ឧត្ដមសេនីយ៍ឯកប្រទេសអូស្ត្រាលី។
ក្រៅពីនេះ មិនមានឈ្មោះថ្នាក់ដឹកនាំប្រទេសផ្សេងទៀត ជាពិសេសប្រទេសនៅក្នុងទ្វីបអឺរ៉ុប ក្នុងបញ្ជីនេះទេ។
សេចក្ដីជូនដំណឹងបានបញ្ជាក់ថា ចំពោះថ្នាក់ដឹកនាំចិន និងបារាំង និងរួមទាំងព្រះអង្គម្ចាស់មានសែរាជវង្សជប៉ុន គឺជាភ្ញៀវពិសេស ដែលនឹងត្រូវទទួលបដិសណ្ឋារកិច្ចដោយសម្ដេចម៉ែ និងព្រះមហាក្សត្រផ្ទាល់។
ព្រះអង្គម្ចាស់ ស៊ីសុវត្ថិ ធម្មិកោ អតីតទីប្រឹក្សាផ្ទាល់របស់ព្រះមហាវីរក្សត្រ មានបន្ទូលនៅថ្ងៃទី២៦ មករា ថា នេះជាប្រពៃណីរបស់ព្រះករុណាព្រះមហាក្សត្រ និងអតីតព្រះករុណា ព្រះមហាវីរក្សត្រ ក្នុងការទទួលភ្ញៀវកិត្តិយសជាន់ខ្ពស់ ដែលអញ្ជើញមកទស្សនកិច្ចស្រុកខ្មែរ ជាពិសេសថ្នាក់ដឹកនាំប្រទេសចិន សែរាជវង្សជប៉ុន ដែលមានចំណងជិតស្និទ្ធ។
ព្រះអង្គម្ចាស់ ស៊ីសុវត្ថិ ធម្មិកោ៖ «ចំពោះរាជវង្សជប៉ុន ដោយសារថារាជវង្សជប៉ុន និងព្រះករុណា ព្រះមហាវីរក្សត្រ ហើយនិងព្រះករុណា ព្រះមហាក្សត្រ បច្ចុប្បន្នមានទំនាក់ទំនងជិតស្និទ្ធ។ ជាមួយរាជវង្សដទៃទៀត យើងអត់មានទំនាក់ទំនងជិតស្និទ្ធ។ ហេតុដូច្នេះ ក្នុងឱកាសរៀបចំបុណ្យព្រះបរមសពរបស់ព្រះករុណា ព្រះមហាវីរក្សត្រ ច្បាស់ហើយថាព្រះករុណា ព្រះមហាក្សត្រី ព្រះរាជមាតាជាតិខ្មែរ លោកនឹងទទួលភ្ញៀវកិត្តិយសទាំងអស់ ជាពិសេសប្រទេសចិន ផង ខាងរាជវង្សជប៉ុន លោកនឹងទទួលលោកនាយករដ្ឋមន្ត្រីបារាំង ដែរ លោក ហ្សង់ម៉ាក អៃរ៉ូល»។
ព្រះមហាវីរក្សត្រ នរោត្តម សីហនុ បានយាងសោយទិវង្គត ក្នុងព្រះជន្ម ៩០ព្រះវស្សា នៅថ្ងៃទី១៥ ខែតុលា ឆ្នាំ២០១២ នៅទីក្រុងប៉េកាំង ប្រទេសចិន ហើយព្រះរាជពិធីថ្វាយព្រះភ្លើង ព្រះបរមសពព្រះអង្គនឹងប្រព្រឹត្តទៅនៅថ្ងៃទី៤ ខែកុម្ភៈ ឆ្នាំ២០១៣ ខាងមុខនេះ៕ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.