ដោយ ដែន អយុធ្យា
2012-07-18
មន្ត្រីរាជការដែលទើបប្រឡងចូលក្របខ័ណ្ឌក្រសួងសុខាភិបាលថ្មីៗ នេះ បានលើកឡើងពីអំពើពុករលួយកំពុងកើតមានក្នុងក្រសួងសុខាភិបាល និងស្នើឲ្យលោករដ្ឋមន្ត្រីក្រសួងសុខាភិបាល បើកការស៊ើបអង្កេត និងមានវិធានការទប់ស្កាត់។
១២-តុលា-០៩: សាកលវិទ្យាល័យវិទ្យាសាស្រ្ដសុខាភិបាលក្នុងរាជធានីភ្នំពេញ។
បុគ្គលិកពេទ្យទើបប្រឡងចូលក្របខ័ណ្ឌ នៃក្រសួងសុខាភិបាលមិនបង្ហាញឈ្មោះមួយចំនួន មានចម្ងល់ចំពោះសកម្មភាពរបស់មន្ត្រីបម្រើការក្នុងស្ថាប័នថ្នាក់ ក្រោមក្រសួងសុខាភិបាល ដែលតម្រូវឲ្យពួកគេបង់ប្រាក់ម្នាក់ៗចន្លោះពី ១០ដុល្លារទៅ១៥ដុល្លារ មិនផ្តល់វិក្កយបត្របន្ទាប់ពីចាត់ឲ្យទៅបំពេញការងារក្នុងអង្គភាព នានា នាដើមខែកក្កដា ឆ្នាំ២០១២។
ប្រភពដដែលបានស្នើឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាលជួយមានវិធានការ និងស៊ើបអង្កេតជាបន្ទាន់ ដើម្បីទប់ស្កាត់ភាពមិនប្រក្រតីកុំឲ្យកើតមានក្នុងវិស័យសុខាភិបាល នាថ្ងៃអនាគត។
ទោះយ៉ាងណា វិទ្យុអាស៊ីសេរី មិនអាចទាក់ទងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីបំភ្លឺជុំវិញការចោទប្រកាន់ពីសកម្មភាពប្រមូលប្រាក់ មិនផ្តល់វិក្កយបត្រពីបុគ្គលិកពេទ្យទើបប្រឡងចូលក្របខ័ណ្ឌក្រសួង សុខាភិបាលបានទេតាមទូរស័ព្ទ នៅថ្ងៃពុធ ទី១៨ ខែកក្កដា។
ទាក់ទិនបញ្ហានេះ លោក កែវ រ៉េមី មន្ត្រីនាំពាក្យ និងជាសមាជិកក្រុមប្រឹក្សាជាតិប្រឆាំងអំពើពុករលួយ លោកបានស្វាគមន៍រាល់គ្រប់ពាក្យបណ្ដឹង ដែលប្រជាពលរដ្ឋ ឬមន្ត្រីរាជការក្នុងស្ថាប័ននានា ប្ដឹងមកអង្គភាពរបស់ខ្លួន ពាក់ព័ន្ធបញ្ហាពុករលួយអ្វីមួយ។
លោក កែវ រ៉េមី៖ «មានបញ្ហាទាក់ទងនឹងសំណូក ឬទាមទារជំរិតយកលុយជាដើម សុំលើកទឹកចិត្តប្ដឹងមកស្ថាប័នយើងខ្ញុំ។ ហើយទាក់ទងចំណាត់ការ គឺពួកយើងដឹងថា ត្រូវធ្វើអី ព្រោះយើងមានក្រុមអ្នកទទួលពាក្យបណ្ដឹង និងពិនិត្យមើលទៅតាមប្រភេទនៃបណ្ដឹង ពីព្រោះប្រជាជនលោកប្ដឹងច្រើនណាស់។ ដូច្នេះ យើងត្រូវបែងចែកតាមប្រភេទអាទិភាពជាបន្តបន្ទាប់ ទៅតាមបណ្ដឹងធ្ងន់ស្រាល។ យើងលើកទឹកចិត្តឲ្យមានការចូលរួមពីមហាជន»។
បន្ថែមលើនេះ លោក ភួង សុវណ្ណ ប្រធានសមាគមមន្ត្រីរាជការឯករាជ្យកម្ពុជា ក៏បានស្នើឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាលជួយស៊ើបអង្កេត និងទប់ស្កាត់ភាពមិនប្រក្រតីកំពុងកើតមាន នៅក្នុងក្រសួងសុខាភិបាល ឲ្យបានទាន់ពេល ដើម្បីរក្សាតម្លៃស្ថាប័នខ្លួន។
លោក ភួង សុវណ្ណ៖ «តួនាទី ភារកិច្ចរបស់អ្នកបម្រើសេវារដ្ឋបាល គឺគាត់ទទួលប្រាក់បៀវត្សពីក្រសួងស្ថាប័នរបស់រដ្ឋដូចគ្នា។ ដូច្នេះ ការយកសេវាបន្ថែមទៅលើកិច្ចការ ជាកិច្ចការរបស់ខ្លួន ជាទង្វើអសីលធម៌ក្នុងការងាររដ្ឋបាលរបស់ខ្លួន។ ខ្ញុំសូមអំពាវនាវចំពោះស្ថាប័ននៃរាជរដ្ឋាភិបាល សុំឲ្យជួយធ្វើម៉េចជួយកែទម្លាប់នៃការប្រព្រឹត្តិអំពើពុករលួយជា ប្រព័ន្ធ ពីថ្នាក់ក្រោមដល់ថ្នាក់លើ។ ពីព្រោះថា ប្រទេសកម្ពុជាមានច្បាប់ប្រឆាំងនឹងអំពើពុករលួយ»។
លោកថា បើស៊ើបអង្កេតរកឃើញអំពើពុករលួយកើតមានក្នុងវិស័យសុខាភិបាល ដូចការអះអាងរបស់បុគ្គលិកពេទ្យទើបជាប់ក្របខ័ណ្ឌក្នុងក្រសួង សុខាភិបាលមែននោះ ថ្នាក់ដឹកនាំក្រសួងសុខាភិបាលត្រូវមានវិធានការទប់ស្កាត់។
ក្រសួងសុខាភិបាល កាលពីថ្ងៃទី១២ ខែមិថុនា ឆ្នាំ២០១២ បានសម្រេចជ្រើសរើសបុគ្គលិកជាង ១ពាន់នាក់ បញ្ចូលក្នុងក្របខ័ណ្ឌក្រសួង និងបានចាត់ឲ្យទៅបម្រើការងារនៅតាមមន្ទីរ ឬអង្គភាពពាក់ព័ន្ធនានាទូទាំងប្រទេស ដែលខ្វះបុគ្គលិកធ្វើការ ចាប់ពីថ្ងៃទី១ ខែកក្កដា ឆ្នាំ២០១២៕ ប្រភពពី RFA
Hello, my name is Jack Sparrow. I'm a 50 year old self-employed Pirate from the Caribbean.