មជ្ឈមណ្ឌលសិក្សា សន្តិភាពសហគមន៍ក្រាំងតាចាន់

តាកែវ-ប្រជាជន និងក្រុមយុវជនប្រមាណជា ជាង ៤០០នាក់ បានចូលរួម ក្នុងពិធី សម្ភោធ មជ្ឈមណ្ឌលសិក្សា សន្តិភាព សហគមន៍ក្រាំងតាចាន់ ​ នៅរសៀល ថ្ងៃទី​០៥​ ខែមិនា ឆ្នាំ២០១២ ក្រោម អធិបតេយ្យភាព ឯកឧត្តមបណ្ឌិត ចន្ទ័ សារុន រដ្ឋមន្រ្តីក្រសួងកសិកម្ម រុក្ខា ប្រមាញ់ និងនេសាទ។​ អាគារមួយ នេះមានទំហំ បណ្តោយ ១៨ម៉ែត្រ ទទឹង ៨​ម៉ែត្រ ដែលចំណាយថវិកាជាង​ពីរម៉ឺន ដុល្លាអាមេរិច ដែលជាគម្រោងឧបត្ថមពី អង្គការយុវសន្តិភាព និងវិទ្យាស្ថានសន្តិភាពកម្ពុជា ក្រោម ជំនួយរបស់អង្គការ IFA, OSI, GIZ។​

លោក ឡុង ខែត្រ នាយកអង្គការយុវសន្តិភាព និងវិទ្យាស្ថានសន្តិភាពកម្ពុជា មានប្រសាសន៍ថា​ “ដើម្បីរក្សាប្រវត្តិរឿងរ៉ាវទាំងឡាយដែលកើតមាននៅក្នុងសម័យខ្មែរក្រហមពីឆ្នាំ​១៩៧៥​ ដល់​១៩៧៩ ឲ្យបាន យូរអង្វែង ទុកជាកេរដំណែលនៃការចងចាំ នៅថ្ងៃ​អនាគត សម្រាប់​សិក្សា​រៀនសូត្រ​ អង្គការ យុវសន្តិភាព និងវិទ្យាស្ថានសន្តិភាពកម្ពុជា​ បានធ្វើការងារជាច្រើន​ នៅតាម សហគមន៌​ ដើម្បីផ្តល់ឳកាស ដល់យុវជន ស្វែងយល់អំពី របបខ្មែរក្រហម​ ​ការផ្សះផ្សា និងអង្គជំនុំ​ជម្រះវិសាមញ្ញក្នុងតុលាការកម្ពុជា”។​  លោកបានបន្ត ទៀតថា ​“ អង្គការយុវសន្តិភាព និងវិទ្យាស្ថាន​សន្តិភា​ពកម្ពុជា កំពុងជំរុញលើកទឹកចិត្ត ដល់​យុវជនចេះពិភាក្សា ពីរឿងរ៉ាវឈឺចាប់ទាំងនោះ ជាមួយ​អ្នកដែលបានឆ្លងកាត់សម័យខ្មែរក្រហម ដើម្បីការផ្សះផ្សានៅក្នុង សហគមន៌ និងសង្គម និងរក​វិធី​សាស្រ្ត​ថែ​រក្សាប្រវត្តិ​រឿងរ៉ាវ​ទាំងនោះកុំ​ឲ្យ​បាត់បង់។ អង្គការយុវសន្តិភាព និងវិទ្យាស្ថាន​សន្តិភាព​កម្ពុជា មាន​បេសកម្ម​​រៀបចំកែប្រែអតីត​ជាកន្លែងកាប់សម្លាប់ ទៅជាកនែ្លង​សិក្សា​រៀនសូត្រ កនែ្លងជួបជុំ​ពិភាក្សាពិគ្រោះយោបល់​ កនែ្លង​បង្រួបបង្រួម​ និងផ្សះផ្សា កនែ្លងប្រាប់​ពីការពិត និងជាកន្លែងកសាងសន្តិភាពរបស់សហគមន៍ “។

ទាក់ទងទៅនឹងការកសាងកេរដំណែល​ឯកឧត្តមបណ្ឌិត ចន្ទ័ សារុន​ បានមានប្រសាសន៌ផង ដែរថា “នេះជាការងារល្អសម្រាប់ប្រជាជននៅឃុំគុស ដែលអង្គការយុវសន្តិភាព ចុះមកធ្វើការកែរប្រែ​ទីនេះ​ ដែលជា អតីតគុកនៅសម័យខែ្មរក្រហម ទៅជាកន្លែងសិក្សារៀនសូត្រ កន្លែងនៃការចងចាំ និងជាកនែ្លង កសាងសន្តិភាព”។​​ឯកឧត្តមបានបន្តទៀតថា “សូមអំពាវនាវដល់ប្រជាជន ដែលនូវមានវត្ថុ​ប្រើប្រាស់ពី សម័យខ្មែរ សូមយកមករក្សាទុកក្នុងមជ្ឈមណ្ឌល ដើម្បីឪ្យបានគង់វង្សយូរអង្វែងសម្រាប់​ក្មេងជំនាន់ក្រោយ បានដឹង”។

គួរបញ្ចាក់ដែរថា ក្រាំងតាន់​ គឺជាគុក និងជាកនែ្លងសម្លាប់មនុស្សនាសម័យខ្មែរក្រហម។​ ជនរងគ្រោះ ចំនួន   នាក់ត្រូវបានសម្លាប់។ ក្រាំតាចាន់​ស្ថិតនៅក្នុងភូមិក្រាំងតាចាន់ ឃុំគុស​ ស្រុកត្រាំកក់ ខេត្តតាកែវ ដែល មានចំងាយប្រមាណជា ៨៥គីឡូម៉ែត្រពីក្រុងភ្នំពេញ​តាមបណ្តោយ​ផ្លូវជាតិលេខ៣។ មជ្ឈមណ្ឌល សិក្សា សន្តិភាពសហគមន៍ក្រាំងតាចាន់ ត្រូវបានរៀបចំឡើងជាបីបន្ទប់ គឺ​ បន្ទប់បណ្ណាល័យ បន្ទប់សារមន្ទីរ និងបន្ទប់ប្រជុំសហគមន៍។​