ដោយ តាំង សារ៉ាដា
2012-01-07
ក្រុមអ្នកនយោបាយប្រឆាំង និងសហគមន៍ខ្មែរក្រោមនៅឯនាយសមុទ្រ
បានចាត់ទុកថា ថ្ងៃរំដោះ ៧ មករា
គឺជាថ្ងៃឈ្លានរបស់កងទ័ពវៀតណាមមកលើទឹកដីកម្ពុជាពិតប្រាកដ
ព្រមទាំងចោទថា
កងទ័ពខ្មែរក្រោមជាច្រើនបានបាត់បង់ជីវិតលើទឹកដីខ្មែរនាពេល
នោះ ប៉ុន្តែរដ្ឋាភិបាលកម្ពុជាមិនដែលរំលឹកដល់បញ្ហានេះ។
ប៉ូលិសកម្ពុជាបង្ក្រាបព្រះសង្ឃខ្មែរ
ក្រោមធ្វើបាតុកម្មនៅខាងមុខស្ថានទូតវៀតណាម ប្រចាំកម្ពុជា
កាលពីថ្ងៃទី១៧ ខែធ្នូ ឆ្នាំ២០០៧
ផ្ទុយទៅវិញ ក្រុមមេដឹកនាំរដ្ឋាភិបាលកម្ពុជាប្រតិកម្មថា
អ្នកដែលបន្ទោសថ្ងៃ ៧ មករា គឺជាអ្នកដែលបន្ទោសលើខ្លួនឯងប៉ុណ្ណោះ។
រដ្ឋាភិបាលដែលដឹកនាំដោយគណបក្សប្រជាជនកម្ពុជា
តែងរំលឹកដល់គុណរបស់រដ្ឋាភិបាលទីក្រុងហាណូយ
ថាជាអ្នកជួយសង្គ្រោះពលរដ្ឋខ្មែរឲ្យរួចផុតពីរបបប្រល័យពូជ
សាសន៍ខ្មែរក្រហម។ ប៉ុន្តែក្រុមអ្នករិះគន់និយាយថា
ការវាយសម្រុករបស់កងទ័ពវៀតណាមមកលើកម្ពុជា
គឺជាការឆក់យកឱកាសដាក់នឹមត្រួតត្រាអាណានិគមមកលើពលរដ្ឋខ្មែរ
និងដើម្បីឆក់យកធនធានធម្មជាតិ
រួមទាំងដីខ្មែរនៅព្រំដែនតែប៉ុណ្ណោះ។
ចំណែកលោក ថាច់ ង៉ុក ថាច់
ប្រធានសហព័ន្ធខ្មែរកម្ពុជាក្រោមដែលមានមូលដ្ឋានក្នុងទីក្រុង Camden
រដ្ឋ New Jersey មានប្រសាសន៍ថា
ប្រសិនបើរដ្ឋាភិបាលរំលឹកដល់គុណរបស់វៀតណាមនោះ
គេគួររំលឹកគុណដល់កងទ័ពខ្មែរក្រោមរាប់ម៉ឺននាក់
ដែលដឹកនាំដោយកងពល «K» វាយចូលក្នុងទីក្រុងភ្នំពេញមុនគេ
នៅចុងឆ្នាំ១៩៧៨។
លោកបន្តថា នៅក្នុងកំឡុងឆ្នាំ១៩៧៥ រដ្ឋាភិបាលទីក្រុងហាណូយ
បានចាប់ផ្ដើមហ្វឹកហ្វឺនកងទ័ពខ្មែរក្រោមនៅតាមព្រំដែន
កម្ពុជា-វៀតណាម ដើម្បីវាយសម្រុកចូលទឹកដីកម្ពុជានៅពេលមានឱកាស។
លោកថ្លែងថា វៀតណាមបានប្រើយុទ្ធសាស្ត្រយកខ្មែរសម្លាប់ខ្មែរជាមុន
ទើបកងទ័ពវៀតណាមចូលតាមក្រោយ។
ពលរដ្ឋខ្មែរក្រោមម្នាក់ដែលថ្លែងក្នុងលក្ខខ័ណ្ឌមិនបញ្ចេញឈ្មោះ
បានឲ្យដឹងថា ក្រោយពីកងទ័ពវៀតណាមដកចេញពីកម្ពុជា នៅឆ្នាំ១៩៨៩
បានបន្សល់ទុកនៅមន្ត្រីខ្មែរក្រោមមួយចំនួន
ដែលកំពុងកាន់កាប់កិច្ចការធំៗ
ក្នុងជួររដ្ឋាភិបាលរហូតមកទល់សព្វថ្ងៃ រួមមានលោក ឃឹម ប៉ុន
មន្ត្រីជាន់ខ្ពស់ក្នុងប្រព័ន្ធតុលាការកម្ពុជា លោក ដៀង សារ៉ុន
ឧត្ដមសេនីយ៍ផ្កាយពីរនៃកងអង្គរក្សរបស់លោក ហ៊ុន សែន លោក ថាច់ ផែន
នៅក្រសួងឃោសនាការ លោក ដាវ សាវី លោក ដួង រតនា ក៏ដូចជាលោក សេរី ថុន
សុទ្ធសឹងជាទីប្រឹក្សារបស់លោកនាយករដ្ឋមន្ត្រី ហ៊ុន សែន ផងដែរ។
លោក ថាច់ ង៉ុក ថាច់ មានប្រសាសន៍បន្តថា
ប្រសិនបើវៀតណាមមានគោលបំណងជួយកម្ពុជាដោយស្មោះមែននោះ
វៀតណាមមិនត្រូវប្រើវិធីកេងយកទឹកដីរបស់ខ្មែរតាមរូបភាពចុះ
សន្ធិសញ្ញា អនុសញ្ញា ឬកិច្ចព្រមព្រៀងនានា នៅឆ្នាំ១៩៨២ ១៩៨៣
និងឆ្នាំ១៩៨៥ នោះឡើយ។
សាស្ត្រាចារ្យខាងផ្នែកវិទ្យាសាស្ត្រនយោបាយ លោកបណ្ឌិត សុខ ទូច
មានប្រសាសន៍ផ្ទុយពីលោក ថាច់ ង៉ុក ថាច់
ថាកងទ័ពដែលវាយចូលក្នុងប្រទេសកម្ពុជាដំបូង
គឺជាកងទ័ពវៀតណាមសុទ្ធសាធ ដែលវាយសម្រុកពីតាមខេត្តក្រចេះ
ដឹកនាំដោយកងពល ០៩។
លោកមានប្រសាសន៍បន្តថា
ក្រុមអ្នកតស៊ូវាយចូលក្នុងប្រទេសកម្ពុជាជាលើកដំបូងដើម្បីផ្ដួល
រំលំរបបខ្មែរក្រហមនោះ ចែកចេញជា៤ ទីមួយគឺក្រុមមកពីហាណូយ
ដឹកនាំដោយលោក ប៉ែន សុវណ្ណ ចាន់ ស៊ី រស់ សម័យ និង ជា សុទ្ធ ក្រុមទី២
មានលោក ហេង សំរិន លោក ជា ស៊ីម និង លោក ហ៊ុន សែន ក្រុមទី៣
គឺជាក្រុមដែលនៅតាមព្រំដែនខ្មែរ-ថៃ មាន លោក សាយ ផូថង ទៀ បាញ់
ចំណែកក្រុមទី៤ គឺក្រុមជនភាគតិច មានលោក ប៊ូ ថង និង មាត់ លី។
លោកបន្តថា ក្រុមទាំងនេះបានចុះចូលជាមួយវៀតណាម
ដែលអាចធ្វើឲ្យកងទ័ពវៀតណាមងាយស្រួលក្នុងការវាយចូលប្រទេស
កម្ពុជា
ដោយសារក្រុមទាំងនេះស្គាល់ពីទីតាំងភូមិសាស្ត្ររបស់កម្ពុជា
ច្បាស់។
ទោះបីជាយ៉ាងណាក៏ដោយ លោក ទ្រឹង មាណារិន
នាយកផែនការនៃសហព័ន្ធខ្មែរកម្ពុជាក្រោមពិភពលោក មានប្រសាសន៍ថា
រដ្ឋាភិបាលវៀតណាមបានកែនយុវជនខ្មែរក្រោមជាច្រើនឲ្យទៅធ្វើជា
ទាហាន តាមរយៈការគំរាមកំហែងចាប់ឪពុកម្ដាយដាក់គុក
ឬកាត់របបអាហារប្រចាំថ្ងៃជាដើម។
លោកមានប្រសាសន៍បន្តថា វត្តមានរបស់កងទ័ពវៀតណាមនៅកម្ពុជា
គឺជារូបភាពដាក់អាណានិគមសុទ្ធសាធ
តាមរយៈការរៀបចំរដ្ឋបាលមួយពេញទៅដោយជនជាតិវៀតណាម
និងមន្ត្រីខ្មែរដែលមានភក្ដីភាពជាមួយវៀតណាម។
ប៉ុន្តែលោក ជាម យៀប
តំណាងរាស្ត្រចាស់វស្សារបស់គណបក្សប្រជាជនកម្ពុជា មានប្រសាសន៍ថា
ចំពោះវត្តមានរបស់វៀតណាមនៅលើទឹកកម្ពុជាយូរនោះ
មិនមែនជាកំហុសរបស់វៀតណាមនោះទេ ពីព្រោះពេលនោះ
កម្ពុជាបានស្នើសុំឲ្យវៀតណាមជួយពង្រឹងប្រព័ន្ធរដ្ឋបាលរបស់
កម្ពុជា។
ផ្ទុយទៅវិញ
ក្រុមអ្នកឃ្លាំមើលអំពីស្ថានការណ៍នយោបាយរបស់កម្ពុជាបានរិះគន់ថា
ប្រសិនបើរដ្ឋាភិបាលវៀតណាមនាសម័យនោះជួយពង្រឹងដល់រដ្ឋាភិបាល
កម្ពុជាមែន
ចុះហេតុអ្វីបានជាវៀតណាមចុះសន្ធិសញ្ញាលេបយកព្រំដែនគោក
និងព្រំដែនទឹក
ព្រមទាំងកិច្ចព្រមព្រៀងឲ្យពលរដ្ឋវៀតណាមចូលមករស់នៅក្នុងទឹកដី
កម្ពុជាទៅវិញ?
ប្រធានគណៈកម្មាធិការព្រំដែនកម្ពុជា
ដែលមានមូលដ្ឋានក្នុងប្រទេសបារាំង លោក ស៊ាន ប៉េងសែ
បានអំពាវនាវយ៉ាងទទូចដល់រដ្ឋាភិបាលកម្ពុជា
ឲ្យគោរពកិច្ចព្រមព្រៀងទីក្រុងប៉ារីស ឆ្នាំ១៩៩១ ហើយ
លប់ចោលនូវសន្ធិសញ្ញាខុសច្បាប់ទាំងឡាយ ដែលលោកនាយករដ្ឋមន្ត្រី
ហ៊ុន សែន បានចុះហត្ថលេខាជាមួយរដ្ឋាភិបាលទីក្រុងហាណូយ
កាលពេលវៀតណាមកំពុងត្រួតត្រាកម្ពុជា នាទសវត្សឆ្នាំ១៩៨០ នោះ។
កាលពីថ្ងៃទី៥ ខែមករា កន្លងទៅនេះ លោកនាយករដ្ឋមន្ត្រី ហ៊ុន សែន
ថ្លែងថា បើទោះបីជាមានក្រុមអ្នករិះគន់ និងមិនទទួលស្គាល់ថ្ងៃ៧
មករា ក៏ដោយ ក៏លោកនៅតែអរគុណថ្ងៃនេះដដែល
ដែលបានជួយពលរដ្ឋខ្មែរឲ្យរួចផុតពីរបបប្រល័យពូជសាសន៍។
ប្រធានក្រុមប្រឹក្សាឃ្លាំមើលកម្ពុជា ដែលមានមូលដ្ឋានក្នុងទីក្រុង
Norway លោក មែន ណាត មានប្រសាសន៍ថា
ក្រៅពីកម្ពុជាបានបាត់ព្រំប្រទល់របស់ខ្លួនតាមរយៈសន្ធិសញ្ញាក្នុង
ទសវត្សរ៍ឆ្នាំ១៩៨០ កម្ពុជាក៏កំពុងបាត់ទឹកដីរបស់ខ្លួនជាបណ្ដើរៗ
ទៅក្រុមហ៊ុនសម្បទានជាច្រើន
និងតាមរយៈការអនុញ្ញាតឲ្យពលរដ្ឋវៀតណាម
ចូលមករស់នៅក្នុងទឹកដីខ្មែរកាន់តែច្រើនឡើងៗ
ដែលលោកព្រួយបារម្ភថា
ជនជាតិខ្មែរក្លាយជាជនជាតិភាគតិចលើទឹកដីរបស់ខ្លួន
ដូចគេបានធ្វើមកលើកម្ពុជាក្រោមនោះដែរ។
លោក សម រង្ស៊ី
មេដឹកនាំគណបក្សជំទាស់ដែលកំពុងរស់នៅនិរទេសក្នុងប្រទេសបារាំង
កាលពីថ្ងៃទី៦
បានចេញសេចក្ដីថ្លែងការណ៍អំពាវនាវឲ្យពលរដ្ឋខ្មែរទាំងអស់
ចងចាំថា កងទ័ពកុម្មុយនិស្តវៀតណាមបានចូលឈ្លានពានប្រទេសកម្ពុជា
ដោយយកលេសថា មករំដោះប្រជាជនកម្ពុជាពីរបបខ្មែរក្រហម។
សេចក្ដីថ្លែងការណ៍នោះក៏បានសរសេរផងដែរថា
យុទ្ធសាស្ត្ររបស់វៀតណាម
គឺខ្ចីដៃខ្មែរសម្លាប់ខ្មែរតាមគ្រប់រូបភាព
ជាពិសេសក្នុងពេលថ្មីៗ នេះ តាមរូបភាពសេដ្ឋកិច្ច និងសម្បទានដីធ្លី
ដោយលួចប្លន់ និងរឹបអូសដីរបស់ប្រជារាស្ត្រខ្មែរ
យកទៅឲ្យក្រុមហ៊ុនបរទេសជាដើម។
ប៉ុន្តែលោក ជាម យៀប មានប្រសាសន៍ថា អ្នកដែលរិះគន់ថ្ងៃ៧ មករា
គឺសុទ្ធសឹងតែជាក្រុមមនុស្សដែលមាននិន្នាការកាន់ជើងរបបខ្មែរ
ក្រហមប៉ុណ្ណោះ៕
ប្រភពព័ត៌មាន៖ វិទ្យុអាស៊ីសេរី
Hello, my name is Jack Sparrow. I'm a 50 year old self-employed Pirate from the Caribbean.